بدع الشاعر القدير ابو بلال الزهيري وجواب السحاقي

من طرف صقر البادية الإثنين فبراير 11, 2013 9:35 am

ابو بلال الزهيري بديت بالله معيني = الله حسبي وربي طلبت منه الاعانه
بمسك بحبلك الاهي وبا تمسك بديني = وكلمت الصدق واجب بانعتبرها امانه
وصبحت بالصدق ملزم وبانبري يميني = مابدي الشعر حقي ان يتهم بالخيانه
والان يانفس يكفي من الشكوك اتركيني = خليني الشعر واصل مادام راسي ملانه
والان قم يارسولي لاعند ذي قد نسيني = بو فهد شاعر مخضرم بيت الكرم والديانه
الصاحب الجيد حبه باصلحه وسط عيني = ذي لاطرحته بموقف قد بايغطي مكانه
سلام من عطر رشه والورد والياسميني = والفل والند خذله لاما تملي مكانه
جيت اسالك وانت جوب ضاهر وبينك وبيني = هل هو صحيح الزهيري انه غريمه زمانه
فالوقت هذيه بذات قد زاد فيني حنيني= لما تعرض نبينا لسب هو والاهانه
وستنكرو الجماعه روسي وهندي وصيني = ونحن قمنا مثلهم بشجب هو والا دانه
ونيه نددت مثلك ولاكن انما كفيني = هل شي معك حل ثاني تغير الاصطوانه
هذيه فصل انتبه له قد شاب راس الجنيني = لاشفت سكروب راخي اخذت فاليد بانه
وفصل ثاني سمعتك بدك تصفي جريني = ولاسمعنا مرونه في زاملك او ليانه
حملتها شخص واحد حارس بلادي وطيني = واعمال عنده كثيره يريد منا اعانه
اشيا كثيره عملها المنجزات اخبريني = من مسوره لاسقطره ومن جبن لا جحانه
باقولها لك صراحه ان به خصال اعجبيني = بالصدق لازم نكلم ولايجوز احتقانه
اذا الغلط عند غيره ذي شل مافي عريني = واكبر مصيبه علينا من صا حبين الحصانه
شف الفساد الاداري ذي لايغربل طحيني = قسمه لحاله سبيه والشعب قسمه كبانه
جيت اسالك وانت جوب احد بيسمع انيني = اوكل واحد مصلح اصابعه في اذانه
والامر لابد يحتل مهما تطول السنيني = بالعلم والحلم نصلح ماهو ببندق وزانه
واخر سؤالي عزيزي ابيات شعري هديني = قالين لي قوم بصلح بشرط مابه ادانه
والصلح بيكون بينك انته وابن الحنيني = باقولها يصدقائي كلن لسانه حصانه
مشتي تكونو كصدام ولا مثيل الخميني = ذي طيرو بالملايين وراح مافلخرانه
وختم وصلي وسلم على الشفيع الاميني = عديد مرعد يرعد ورخت شخوب المزانه

جواب ابو فهد السحاقي

ياالله اليك التجينا ولا سواك يلتقيني =يا رحم من الام والاب عظيم عفوه وشانه
يامن عليك اتكالي في كل لحظه وحيني= اغفر لعبدك ذنوبه واصون زلة لسانه
يقول ابوفهد مرحب بضيف شاعر حميني=يانابل الموس ذبّح للوافدين من سمانه
ابو بلال الزهيري صديق وافي لفيني=معروف شاعر محنك وهو بسن الحضانه
بانفرش الورد تحته ونحضنه في يميني = باجود الطيب رشه ينفح سنه من زنانه
يرحب وحيا سواله ذي قال بينه وبيني= ذي اعلنه في صحيفه واضح قرأنا بيانه
لاول سوالك نجوب شكاك ذي اوجعيني=سبو رسول الهدايه عصبه حقيره جبانه
واجب على كل مسلم صييني وتركي وغيني= يواجهو كل حاقد ويردعوه في مكانه
والوقت ما يحمل العيب العييب موجود فيني =كلن يراجع حسابه يعمل لنفسه صيانه
وانا على الجمر قابض ماسك بيدي لديني= الله حسبي وعوني والنفس دونه مهانه
وفصل ذي قلت ثاني ذي جُلهن نقديني= من واجبي قول رايي والصدق قوله امانه
ماشي حبوب في جرينك ولا رفه في جريني= قمح العصيد استرالي مغشوش نصه عفانه
واسبابها ساسة الويل ذي عمرو وسط طيني = كنت ازرع القمح في الحقل بالمجرفه والحجانه
قد كنت بدوي مزارع وحولوني مديني =قالو تقدم حضاري ولا قدمنا بنان
اما المشاريع ذي قلت ماظنهن ينفعيني=ميتين فندق معانا والفين مرقص وحانه
ساد الفساد الادري قبال عينك وعيني =الشعب في فقر مدقع الجوع هدّم كيانه
باحمل الوم صالح ربّى حداء اغربيني= لحمي كمل نتفينه بعلته ونتانه
نسور من بيت الاحمر قد نكعين كل نيني= قد نظفين كل زيمه واخلين ذي في الخزانه
وقد صبرنا عليهم عسى تحسُن يجيني= سبعه وعشرين دارت والبار شاهر عنانه
وكيف با يصلح الوضع وعشرين بليار ديني=وجانبه قيمة النفط فوق الهبه والاعانه
قدمة لك شرح وافي عن واضع اندى جبيني=اذا ما قبلت النصيحه باتنقدك بت شبانه
بسلم با عارض الوضع دعمي وعوني يقيني=ما جامل احد بكلمه لو يقصفوني بدانه
مثلتني مثل صدام ومثل الامام الخميني=وانا مواطن مسيكين سعري في السوق عانه
والختم هبو معيا ياكل مومن بديني=لنصرة نبينا محمد من كل من قد اهانه[/

من طرف عمر الزهيري الأحد فبراير 17, 2013 2:14 pm

يعطيك العافيه على نقل هذه الدرر القيمه
ابيات ولا اروع
صح الله لسان الشاعرين
وسلمت اناملك اخي الكريم

بدع الشاعر القدير ابو بلال الزهيري وجواب السحاقي

بدع الشاعر القدير ابو بلال الزهيري وجواب السحاقي

رد: بدع الشاعر القدير ابو بلال الزهيري وجواب السحاقي